Таразда тұрғын үйдің ауласында пышақ жарақатын алған 24 жастағы жігіт қайтыс болды. Оқиға орнына шақырылған жедел жәрдем бригадасы белгіленген уақыттан жеті минут кеш жеткен. Бұл деректі Жамбыл облыстық жедел медициналық жәрдем станциясы SHYNDYK.KZ редакциясының ресми сауалына берген жауабында растады.
Медициналық мекеменің мәліметінше, 3 қазан күні сағат 17:22-де Абай көшесінде адам пышақталғаны туралы шақырту түскен. Оған шұғылдықтың бірінші санаты берілген. Мұндай жағдайда жедел жәрдем 10 минут ішінде жетуі тиіс. Алайда бригада оқиға орнына 17 минуттан кейін барған. Оның тоғыз минуты жолға жұмсалған.
«Осылайша, белгіленген жету уақыты сақталмаған (жолға кеткен уақыт – 9 минут)», – делінген медициналық ұйымның ресми жауабында.
Жедел жәрдем келген кезде жарақат алған жігіт оқиға орнында болмаған. Станцияның хабарлауынша, полиция қызметкері науқастың жеңіл автокөлікпен алып кеткенін айтқан.
Марқұмның туыстары оқиға кезінде куәгерлердің жедел жәрдемге хабарласа алмағанын да мәлімдеген. Медициналық ұйым бұл жағдайға қатысты түсініктеме берді. Қайғылы оқиға болған күні сағат 16:00 мен 17:30 аралығында станцияға 189 қоңырау түскен. Оның 69-ы жедел жәрдем шақыртуы болған. Диспетчерлердің жауап беруі кешігуі мүмкін екенін мекеме операторларға түскен жүктеменің көптігімен және қайта-қайта шалынған қоңыраулармен байланыстырды.
«Көрсетілген уақыт аралығында шақыртуларды қабылдау, өңдеу және жолдау жүйесінде техникалық ақаулар тіркелген жоқ. Жүйе қалыпты режимде жұмыс істеді», – деп хабарлады станция.
Дегенмен оқиға куәгерлерінің нақты қанша рет қоңырау шалғаны және диспетчер жауабын қанша уақыт күткені әзірге анықталмаған. Қосымша тексеру жүргізу үшін медициналық ұйым қоңырау шалған адамдардың телефон нөмірлерін ұсынуды сұрады. Қызметкерлердің салғырттығы дәлелденсе, оларға тәртіптік шара қолданылуы мүмкін.
Жамбыл облыстық полиция департаменті адам өлтіру дерегі бойынша қылмыстық іс қозғалғанын хабарлады. Күдікті көп ұзамай ұсталып, уақытша ұстау изоляторына қамалған. Тергеу департамент басшылығының бақылауында. Алайда марқұмның туыстары қылмысқа қатысы болуы мүмкін деп күдіктенген тағы екі ер адамның іс бойынша қандай мәртебеге ие екені нақтыланбады.
Бұған дейін SHYNDYK.KZ 3 қазанда Тараз қаласындағы Абай көшесінде 24 жастағы жігіттің пышақталып өлтірілгені туралы жазған. Марқұмның артында екі баласы қалды. Редакцияға жүгінген туыстары қылмыс қызғаныш салдарынан жасалғанын, ал тағы екі ер адам күдіктінің қашып кетуіне көмектескенін мәлімдеген. Отбасы жедел жәрдем шақыру кезінде де қиындықтар туындағанын айтып, оқиғаға қатысы болуы мүмкін барлық адамның әрекетін тексеруді талап етті.
