Маңғыстау облысында екі жасар қыз қарақұртпен байланыста болғаннан кейін ауыр халде ауруханаға жеткізілді. Комаға түскен бүлдіршін он күн жансақтау бөлімінде жатып, өкпені жасанды желдету аппаратына қосылған. Дәрігерлер оның өмірін сақтап қалды, деп хабарлайды SHYNDYK.KZ.
Алдын ала мәлімет бойынша, балалар ойнап жүрген кезде олардың бірі екі жасар қызға қарақұрт берген. Бүлдіршін өрмекшіні жұтып қойған болуы мүмкін. Бұл туралы оқиға кезінде жанында болған алты жасар бала айтып берген. Көп ұзамай қыздың жағдайы күрт нашарлаған. Алайда қарақұрттың шаққаны немесе баланың оны жұтып қойғаны нақты расталмаған.
Алғашында қыз аудандық ауруханаға түскен. Дәрігерлер оның жағдайын бағалап, облыстық мамандармен телемедициналық кеңес өткізген. Науқасқа қарақұрт уына қарсы сарысу енгізіліп, медициналық авиация арқылы Маңғыстау облыстық балалар ауруханасына жеткізілген. Тасымалдау кезінде бүлдіршін жасанды тыныс алдыру аппаратына қосылған.
Облыстық ауруханаға түскенде қыз бірінші дәрежелі комада болған. Анестезиология, реанимация және қарқынды терапия бөлімінің меңгерушісі Мереке Бекбаевтың айтуынша, баланы емдеуге республикалық мамандар да тартылған. Дәрігерлер консилиум өткізіп, қарқынды ем жүргізген. Қарақұрт уына қарсы сарысу екі рет енгізілген.
Он күн бойы жансақтау бөлімінде жатқан қыздың жағдайы біртіндеп жақсарған. Ол есін жиып, өздігінен тыныс ала бастаған соң өкпені жасанды желдету аппаратынан ажыратылды. Кейін тағы төрт күн бейінді бөлімде ем қабылдап, жағдайы қанағаттанарлық деп бағаланғаннан кейін үйіне шығарылды.
