Қазақстанда 2027 жылғы 1 қаңтардан бастап еңбекке қабілеттілігінен айырылған және асыраушысынан айырылуына байланысты әлеуметтік төлем алатын азаматтарға берілетін қаржыны 8,5 пайызға көбейту ұсынылды. Бұл туралы SHYNDYK.KZ хабарлайды.
Еңбек және халықты әлеуметтік қорғау министрлігі тиісті үкімет қаулысының жобасын әзірледі. Құжат «Ашық НҚА» порталында қоғамдық талқылауға шығарылды.
Жоспарланған өзгеріс Мемлекеттік әлеуметтік сақтандыру қорынан (МӘСҚ) төлем алатын азаматтарға қатысты. Қаулы қабылданса, еңбекке қабілеттілігінен айырылу және асыраушысынан айырылу жағдайлары бойынша тағайындалған әлеуметтік төлемдер 8,5 пайызға ұлғаяды.
Әзірге бұл ұсыныс түпкілікті бекітілген жоқ. Құжат қоғамдық талқылау кезеңінен өткен соң ғана тиісті шешім қабылданады.
