Республика күні мерекесі қарсаңында Қасым-Жомарт Тоқаев елдің өркендеуіне елеулі үлес қосқан азаматтарды мемлекеттік марапаттармен ұлықтады. Марапатталғандар қатарында еңбек ардагерлері, өндіріс, бизнес, білім, денсаулық сақтау саласының қызметкерлері, мәдениет қайраткерлері мен әскери қызметшілер бар.
Ең жоғары дәрежелі марапат – «Қазақстанның Еңбек Ері» атағы (Айрықша ерекшелік белгісі – Алтын жұлдыз бен «Отан» орденін тапсыра отырып) өндірістегі асқан еңбегі үшін «Kazakhmys Smelting» ЖШС Жезқазған мыс қорыту зауытының балқытушысы Абдрашит Доспановқа берілді.
«МұзАРТ» тобының құрылуына үлкен үлес қосқан композитор А. Қоразбаев «Отан» орденімен марапатталды. Түрлі дәрежедегі «Барыс» орденімен «TNS-group концерні» ЗТБ президенті Т. Жұмағұлов, актер Н. Ықтымбаев, білім беру саласының ардагері Е. Мәмбетқазиев, аты аңызға айналған альпинист Қ. Уәлиев, «Ново-Приречное» ЖШС директоры В. Тюркин және «Ардагерлер ұйымының» Ақтөбе облыстық филиалының төрағасы С. Шаңғұтов марапатталды.
«Парасат», «Құрмет» және «Ел бірлігі» ордендерімен танымал ғалымдардың, аграрийлердің, дәрігерлердің, меценаттар мен ұлтаралық татулықты нығайтып жүрген қоғам қайраткерлерінің еңбегі еленді. «Қазақстанның халық әртісі» құрметті атағы өнер қайраткерлері Т. Мұсабаев пен Н. Өтеуловке берілді. Сондай-ақ бірқатар азаматқа Қазақстанның еңбек сіңірген қайраткері, ұстазы және дәрігері атақтары табысталды.
Жалпы алғанда, мемлекеттік марапаттарға 129 еңбек ардагері, 473 өндіріс саласының қызметкері, 200-ден астам бизнес өкілі, 150-ден аса педагог және 120 дәрігер ие болды. Қызметтік борышын үлгілі атқарғаны үшін бір топ әскери қызметшілер мен құқық қорғау органдарының қызметкерлері «Даңқ», «Айбын» ордендерімен және медальдармен марапатталды.
