Мәжілістің бұрынғы депутаты Ринат Зайыт Қазақстан Республикасы Қарулы күштерінің Ұлттық әскери-патриоттық орталығына басшы болып тағайындалды. Ол жаңа қызметіне қазан айының басында кіріскен. Бұл туралы Зайыт Adal ADAM YouTube арнасына берген сұхбатында мәлімдеді.
Оның айтуынша, орталықты басқару туралы ұсыныс жаңа қорғаныс министрінен түскен. Қорғаныс министрлігіне қарасты мекеме әскери қызметшілер мен әскерге шақырылуға дейінгі жастар арасында патриоттық тәрбие жұмыстарын жүргізеді. Сондай-ақ мәдени іс-шаралар ұйымдастырады. Орталықтың құрамында әскери ансамбль мен оркестр бар.
Ринат Зайыт жаңа қызметке келісім беруіне қорғаныс саласында қолға алынған реформалар әсер еткенін айтты.
«Соңғы оқиғалардан кейін Мемлекет басшысы Қасым-Жомарт Тоқаев қорғаныс саласында түбегейлі өзгерістер жасауды тапсырды. Бұл реформалар қазірдің өзінде басталды. Мен өзгерістерге атсалысқанды ұнатамын. Сондықтан ұсынысты қуана қабылдадым. Осы реформаларға аз да болса үлес қоссам деген ниетпен келдім», – деді ол.
Бұрынғы депутаттың жаңа қызметке кіріскені Маңғыстау облысында 14 әскери қызметшінің қаза тапқаны туралы ақпарат тараған кезеңмен тұспа-тұс келді. Алайда Зайыт бұл оқиғалардың өзінің тағайындалуына тікелей әсер еткенін айтқан жоқ.
