Астанада түнгі клубтың алдында дәрет сындырған ер адам 10 тәулікке әкімшілік қамаққа алынды. Сот оны ұсақ бұзақылық жасағаны үшін кінәлі деп таныды.
Оқиға 17 қазан күні таңғы сағат 05:00 шамасында болған. Соттың мәліметінше, ер адам сол кезде қатты мас болған.
Сот отырысында ол кінәсін толық мойындап, өкінетінін айтқан. Нәтижесінде оған 10 тәулік әкімшілік қамаққа алу жазасы тағайындалды. Сот қаулысы әзірге заңды күшіне енген жоқ.
Бұған дейін әлеуметтік желіде ер адамның түнгі клуб алдында дәрет сындырып тұрған видеосы тараған. Жазба авторы оның полиция қызметкері екенін, сондай-ақ оқиға алдында қызметін алға тартып, күзетшілерді қорқытқанын мәлімдеген. Бұған дәлел ретінде полиция қызметкерінің куәлігі делінген құжаттың суреті де жарияланған.
Алайда сот ер адамның қайда жұмыс істейтінін нақтыламады. Оның полиция қызметкері екені әзірге ресми түрде расталған жоқ.
