23 қазанда елордадағы alem.ai Халықаралық жасанды интеллект орталығында тарихи кездесу өтті: NVIDIA негізін қалаушы Дженсен Хуанг Қазақстан билігінің шақыруымен Астанаға келді, деп хабарлайды SHYNDYK.KZ. Әлемдік экономиканы өзгертіп жатқан технологиялық корпорация басшысы сапары барысында дәстүрлі қазақ шапанын киіп, көпшіліктің ықыласына бөленді.
AI Month форумы аясында Хуанг ҚР Цифрлық даму, инновациялар және аэроғарыш өнеркәсібі министрі Жаслан Мәдиевпен кездесті. Келіссөздердің басты тақырыптары жасанды интеллект экожүйесін дамыту, білікті IT-мамандарды даярлау, озық есептеу инфрақұрылымын құру және қазақстандық стартаптардың әлемдік нарыққа шығуына қолдау көрсету болды.
Бұл сапар технологиялық ынтымақтастықтың кеңейіп жатқан тұсында өтіп отыр. NVIDIA өкілдерінің мәліметінше, «Қазақтелеком» Астана мен Алматыда жүздеген қуатты графикалық процессорларды орнатып үлгерген. Алдағы уақытта Қазақстан есептеу қуатын еселеп арттыруды, соның ішінде Екібастұзда ірі дата-орталықтар салуды жоспарлап отыр. Бұл еліміздің ЖИ саласындағы аймақтық хабқа айналуына жол ашады.
