Қазақстандық жеңіл атлет, «Әділет» фракциясынан Құрылтай депутаты және мотивациялық спикер Айсұлу Сүлейменова V Азия Параойындарында тамаша нәтиже көрсетті. Ол 100 метрге жүгіруден құрлық рекордын жаңартты, деп хабарлайды SHYNDYK.KZ.
Осындай үлкен жеңіске жеткен спортшы желідегі парақшасында өткен күндерін еске алып, осы тұғырға жету үшін қандай қиындықтарды еңсергенін жазды. Айсұлу өмірінің күрт өзгеретінін білмей оянған сол бір кішкентай қызды жиі еске алатынын мойындады. Оған бәрін нөлден бастауға, жаңа денеде өмір сүруді үйренуге, айнадағы бейнесіне қайта бой үйретуге және өзгелердің көзқарасына мән бермей, жаны қинала тұра күлімсіреуге тура келген.
Чемпионның айтуынша, сол бір қиын-қыстау шақта ол қайтадан жүгіріп, сөреде тұратынын және жеңіске жететінін елестете де алмаған. Енді адамдар одан «Қалай аман қалдың?» деп емес, «Мұндай жетістікке қалай қол жеткіздің?» деп сұрайтын күн туды.
Бүгінде Айсұлу Сүлейменованың тарихы тек спортпен шектелмейді. Бұл – ең қиын кездің өзінде берілмеуге шақыратын, мыңдаған адамды шабыттандыратын қайсарлық пен асқақ рухтың айқын көрінісі.
