Алматы халықаралық әуежайында жолаушылардың наразылығын тудырған оқиға болды. Ұшып шығу залында төбеден ақ түсті сұйықтық тамып, орындықтар мен еденге жайылған. Оқиғаның видеосы әлеуметтік желілерде тарады.
Куәгерлердің айтуынша, жағдай әуежайдың бірінші қабатындағы ұшып шығу залында болған. Жарияланған кадрлардан жолаушыларға арналған орындықтар мен едендегі ақ дақтарды көруге болады. Сол маңда қол жүгімен жүрген адамдар да болған.
Видео авторлары төбеден ақтау қоспасы немесе цемент ерітіндісі тамуы мүмкін екенін болжаған. Алайда сұйықтықтың нақты құрамы мен оның қайдан пайда болғаны әзірге белгісіз.
Жолаушылар әуежай қызметкерлерінен түсініктеме талап еткен. Дегенмен ғимарат ішінде жөндеу жұмыстары жүргізілген-жүргізілмегені және сұйықтықтың адам денсаулығына қауіп төндірген-төндірмегені нақтыланбады.
Сондай-ақ жолаушылар тарапынан ресми шағым түскені және оқиғадан кейін әуежай әкімшілігі қандай шара қабылдағаны белгісіз.
SHYNDYK.KZ редакциясы Алматы халықаралық әуежайына ресми сауал жолдады. Редакция сұйықтықтың шығу себебін, оның құрамын, ғимаратта жөндеу жұмыстарының жүргізілуіне қатысты ақпаратты және жолаушылардың қауіпсіздігін қамтамасыз ету үшін қандай шаралар қабылданғанын сұрады.
Материал жарияланған сәтте әуежай әкімшілігінен ресми жауап түскен жоқ.
