Қазақстанның Ішкі істер министрлігі Халық қаһарманы Ғазиз Байтасов атындағы ведомстволық медаль тағайындады. Бұл шешім Мемлекет басшысының тікелей тапсырмасымен қабылданды. SHYNDYK.KZ хабарлағандай, қаһарманның есімін ұлықтау мақсатында ең алғашқы марапат марқұм тәртіп сақшысының жұбайына табыс етілді.
Жаңа медальмен қызметтік міндеттерін атқару кезінде ерекше ерлік пен батырлық көрсеткен ішкі істер органдарының қызметкерлері марапатталатын болады.
Еске салайық, полиция капитаны Ғазиз Байтасов 2011 жылдың 12 қарашасында Тараз қаласында қарулы лаңкес Мақсат Қариевті ұстау кезінде ерлікпен қаза тапты. Жарақат алғанына қарамастан, полицей қылмыскерді денесімен жауып, адамдар көп жиналған жерде оның гранатаны жаруына жол бермеді. Сол күні қаруланған радикал қару-жарақ дүкеніне шабуыл жасап, полицейлерге оқ жаудырған және облыстық ҰҚКД ғимаратын гранатометтен атқылаған болатын. Байтасов өз өмірін пида ете отырып, бейбіт тұрғындарды аман алып қалды.
ІІМ мәліметінше, тәуелсіздік жылдарында Қазақстанда қызметтік міндетін атқару кезінде 820-дан астам ішкі істер органдарының қызметкері қаза тауып, 5 мыңнан астамы түрлі жарақат алған. Жаңа марапат қоғам қауіпсіздігі үшін жанын пида еткен қаһармандардың есімін мәңгі есте қалдыруға арналған.
