Өзінің құттықтау сөзінде Қазақстан Президенті Республика күні көпғасырлық қазақ мемлекеттілігінің қайта жаңғыруын бейнелейтін айрықша маңызға ие мереке екенін атап өтті, деп хабарлайды SHYNDYK.KZ. Мемлекет басшысының айтуынша, Тәуелсіздіктің 35 жылдығына қарай еліміз экономикасы қуатты, әлемдік аренада ықпалды орта держава ретінде танылған кемел мемлекетке айналды.
Қасым-Жомарт Тоқаев Конституцияның күшіне енуі мемлекеттік басқару жүйесін жаңартуға және барлық саладағы түбегейлі өзгерістерге қуатты серпін бергенін жеткізді. Қазіргі таңда, Президенттің айтуынша, елімізде озық технологиялар мен инновациялар белсенді түрде енгізіліп, жасанды интеллектіні қолдану аясы кеңеюде, жаңа өндіріс орындары ашылып, мектептер, ауруханалар мен басқа да әлеуметтік нысандар бой көтеруде.
Мемлекет басшысы заң, тәртіп, тазалық және еңбекқорлық құндылықтарына негізделген жаңа қоғамдық этиканы қалыптастыру қажеттігіне ерекше тоқталды. «Бірлескен күш-жігеріміздің арқасында Егемендігімізді нығайтып, Әділетті, Қауіпсіз, Озық әрі Таза Қазақстанды құратынымызға кәміл сенемін. Көк туымыз асқақтай берсін! Отанымыз гүлдене берсін!» — деп түйіндеді Қасым-Жомарт Тоқаев.
