Қызылорда облыстық Полиция департаменті 20 жастағы Александр Ивановтың өлтірілуіне қатысты қылмыстық істің тергеу барысы туралы түсініктеме берді. Қазіргі уақытта аталған іс бойынша үш күдікті құрықталып, олардың барлығы уақытша ұстау изоляторына қамалған.
Ведомство өкілдері тергеушілердің оқиға орнынан тәркіленген бейнежазбаларды мұқият зерттеп шыққанын және қазір жанжалға басқа да адамдардың қатысы бар-жоғын тексеріп жатқанын хабарлады.
«Әрбір қатысушының рөлі мен іс-әрекетіне тергеу қорытындысы бойынша тиісті құқықтық баға беріледі», — деп мәлімдеді ПД баспасөз қызметі.
Сондай-ақ, бұл іс департамент басшылығының ерекше бақылауына алынғаны айтылды.
Еске салайық, бұған дейін SHYNDYK.KZ редакциясына марқұмның әпкесі хабарласып, тергеудің біржақты өтіп жатқанына шағымданған болатын. Оның сөзінше, інісіне 11-12 адамнан тұратын топ жабылған, алайда бастапқыда тек бір ғана күдікті қамауға алынды.
Бойжеткен топтық шабуылға қатысқан басқа адамдар жай ғана куәгер мәртебесінде қалып қоя ма деп алаңдаған. Сонымен қатар, ол бейнебақылау камераларының кездейсоқ «істемей қалғанын» және марқұмның жалғыз куәгер досына қысым жасалып жатқанын мәлімдеді.
Осы сұхбаттан кейін SHYNDYK.KZ редакциясы ҚР Ішкі істер министрлігіне ресми сауал жолдаған еді.
