Павлодар облыстық перинаталдық орталығында салмағы небәрі 600 грамм болып дүниеге келген шала туған нәрестенің сан сүйегі сынған. Сәбидің туыстары оқиғаның мән-жайын анықтап, медициналық мекемеге тексеру жүргізуді талап етіп отыр.
«Наша жизнь» басылымының хабарлауынша, 23 қазанда дәрігерлер нәрестенің туыстарына баланың құрысуы кезінде сан сүйегі сынғанын айтқан. Алайда отбасы медициналық қызметкерлерден нақты әрі толық түсініктеме ала алмай отырғанын мәлімдеді.
Туыстары әлеуметтік желі арқылы Қазақстанның Денсаулық сақтау министрлігіне жүгініп, жағдайды тексеруді сұраған. Олардың айтуынша, жансақтау бөліміне ұялы телефон алып кіруге тыйым салынғандықтан, баланың жағдайын фото немесе видеоға түсіру мүмкін емес.
Перинаталдық орталық өкілдері салмағы аз болып туған нәрестелерді күтіп-бағу күрделі әрі ұзақ процесс екенін түсіндірді. Дәрігерлердің мәліметінше, мұндай балаларда сүйек тінінің минералдануы төмендейтін остеопения кездесуі мүмкін. Бұл асқыну шала туған нәрестелердің 30–55 пайызында байқалып, сүйектің тіпті қалыпты қозғалыс кезінде сынуына әкелуі ықтимал.
Медициналық мекеме рентген суретінде сынған жерде бастапқы сүйек бітісу белгілері байқалғанын хабарлады. Дәрігерлердің түсіндіруінше, бұл сүйек тінінің қалпына келе бастағанын көрсетеді. Қазіргі уақытта арнайы емдеу қажет емес.
Орталықтың мәліметінше, нәрестенің жағдайы тұрақты. Ал сүйектің нақты қандай жағдайда сынғаны туралы мәселе әзірге ашық күйінде қалып отыр.
