Оқиға 2009 жылы туған және одан кіші қыздар арасындағы волейболдан Қазақстан чемпионатының екінші турында болған. Шымкенттік «Волейбол Кидс» командасының жаттықтырушысы Хамит Мырзабеков өз тәрбиеленушілерінің бірін ұрған. Оқиғаның бейнежазбасы әлеуметтік желілерде тарады.
Жағдайға Қазақстанның Ұлттық волейбол федерациясы назар аударды. Федерация шешімімен жаттықтырушы ел чемпионатының ойындарына қатысудан шеттетілді.
Шымкент қаласының дене шынықтыру және спорт басқармасының мәліметінше, Мырзабеков жекеменшік «Волейбол Кидс» клубында шамамен алты-жеті ай жұмыс істеген. Оқиғадан кейін ол қызметінен босатылған.
Басқарма өкілдері жаттықтырушының мемлекеттік спорт ұйымдарында жұмыс істемегенін де нақтылады.
Оқиғаның мән-жайы қосымша зерделенбек. Жаттықтырушыны әкімшілік немесе қылмыстық жауапкершілікке тарту мәселесі бойынша әзірге ресми ақпарат жоқ.
