TikTok желісінде Ақтау қаласында митинг өткізуге шақырған бейнежазбалар тарады. Жарияланымдарда әртүрлі адамдардың фотосуреттері қолданылғанымен, үндеулердің мәтіні бірдей.
@zh.beriksabituly парақшасында жарияланған видеоларда 25 қазан күні сағат 12:00-де Ақтауда митинг өтетіні айтылған. Әр видеода басқа адамның суреті көрсетілген, бірақ үндеудің мәтіні өзгермейді. Суреттегі адамдардың бұл жазбаларға қатысы бар-жоғы, өз атынан осындай мәлімдеме жасауға келісім берген-бермегені белгісіз.
Жазбаларда 19 әскери қызметшінің қаза тапқаны айтылған. Алайда бұл мәлімет ресми түрде расталмаған. Соған қарамастан, ол жұртты митингіге шақыру үшін пайдаланылып жатыр.
NoFake.kz мұндай жазбалар көпшілік митингіні қолдап отырғандай әсер қалдыруы мүмкін екенін ескертеді. Бір мәтінді әртүрлі адамның суретімен жариялау арқылы үндеуді бірнеше адам жасағандай көрсетуге болады. Бірақ фотосурет адамның сол сөздерді айтқанын білдірмейді.
Аталған TikTok парақшасына 3,5 мыңнан астам адам жазылған, видеолары 20,6 мыңнан астам лайк жинаған. Жазбаларды кім таратып жатқаны және суреттері пайдаланылған адамдардың бұған қатысы бар-жоғы әзірге анықталған жоқ.
