Танымал қазақстандық волейболшы Сабина Алтынбекова Павлодарда өткен жасөспірімдер турниріндегі бассыздыққа қатысты өз ойын ашық айтты. Спортшы Қазақстан волейбол федерациясын қазіргі жүйені қайта қарап, команда жетекшілері мен жаттықтырушыларға деген бақылауды барынша күшейтуге шақырды.
Алтынбекова өзінің әлеуметтік желідегі парақшасында спорттағы физикалық және психологиялық зорлық-зомбылыққа (соның ішінде буллингке) мүлдем жол беруге болмайтынын қадап айтты.
«Жаттықтырушыларды мұқият тексеру қажет, олардың мінез-құлқы мен жұмыс істеу әдістеріне баға берілуі тиіс. Өкінішке қарай, волейболда кейбір бапкерлердің бойынан қарапайым әдептілік пен мәдениет байқалмайды», — деді спортшы.
Сондай-ақ, ол командалар құрамында бейінді мамандардың тапшы екеніне назар аударды. Оның сөзінше, көптеген ұжымдарда спорттық психолог түгілі, қарапайым дәрігердің өзі жоқ. Алтынбекова бұл сорақы оқиға спорттық жүйені тұтастай қайта қарау қажеттілігін көрсететін айқын дабыл екеніне сенімді.
Еске салайық, бұған дейін SHYNDYK.KZ редакциясы 2009 жылы туған және одан кіші қыздар арасындағы волейболдан Қазақстан чемпионатының II турында болған дау-дамай туралы жазған болатын. Желіде шымкенттік команданың бапкері Хамит Мырзабековтің жас спортшы қызды қатты ұрып жіберген видеосы тарап, жұрттың жағасын ұстатқан еді.
Қоғамдық резонанстан кейін Ұлттық волейбол федерациясы аталған маманды спорттан шеттетті. Ал Шымкент қалалық спорт басқармасы бұл бапкердің мемлекеттік ұйымдарда тіркелмегенін және жекеменшік «Волейбол Кидс» клубында жұмыс істегенін нақтылады. Клуб басшылығы жанжалға іліккен бапкерді бірден жұмыстан шығарған. Қазіргі таңда құзырлы органдар тиісті заңды шаралар қабылдау үшін оқиғаның мән-жайын зерттеуді жалғастырып жатыр.
