Депутат былтыр Салық кодексін қарау кезінде де бұл мәселе бойынша қызу пікірталастар болғанын еске салды. Ол кезде пікірлер екіге жарылған: бір тарап аса қымбат көліктерге, яхталарға және басқа да элиталық мүлікке салынатын салықты айтарлықтай көтеруді ұсынса, екінші тарап жеке табыс салығын (ЖТС) және қосымша табыс түрлеріне мөлшерлемені арттыруды жақтаған.
«Біз бұл мәселелерді Қаржы министрлігімен бірлесіп талқылайтын боламыз, өйткені әрдайым нақты деректерге сүйену қажет. Қазір салық реформасы аясында, прогрессивті салық туралы сөз қозғағанда, бізде айтарлықтай проблема жоқ екенін көріп отырмыз. Бұл бөлік орындалып жатыр, яғни біз әрі қарай да тиісті шешімдер қабылдай аламыз деген сөз», — деп атап өтті Аймағамбетов.
Еске салайық, бүгін Мемлекет басшысы Қасым-Жомарт Тоқаев өз Жолдауында ірі байлық иелері үшін салықтың жоғары мөлшерлемесін енгізуді талқылауды ұсынды. Президент бұл бастама заңды түрде жиналған активтерді шектеу емес, керісінше әділеттілік орнату екенін – әркім елдің дамуына өзінің шама-шарқына қарай лайықты үлес қосуы тиіс екенін баса айтты.
Сонымен қатар, Мемлекет басшысы салық жинауды жақсартып, жаппай цифрландыру және жасанды интеллектіні енгізу арқылы көлеңкелі экономиканы қысқартуды қатаң талап етті.
