Қазақстанда 2027 жылғы 1 қаңтардан бастап шағын және микробизнес субъектілерін тексеруге үш жылдық мораторий енгізілуі мүмкін. Құрылтай депутаты Олжас Құспеков Президенттің бастамасына қатысты пікір білдіріп, кәсіпкерлерге түсетін қаржылық жүктеме мен салық реформасының ықтимал салдары туралы айтты, деп хабарлайды SHYNDYK.KZ.
28 қазанда Мемлекет басшысы Қасым-Жомарт Тоқаев Қазақстан халқына Жолдауында микро және шағын кәсіпкерлік субъектілерін тексеруге үш жылдық мораторий енгізу мүмкіндігін қарастыруды ұсынды.
Respublica партиясынан сайланған Құрылтай депутаты Олжас Құспековтің айтуынша, соңғы жылдары кәсіпкерлерге жүргізілетін тексерулер саны азайғанымен, салынатын айыппұлдар көлемі керісінше артқан. Сонымен қатар экономикалық құқық бұзушылықтарға байланысты қылмыстық істердің қозғалуы да бизнеске кері әсерін тигізіп отыр.
«Тексерулер саны азайғанымен, айыппұлдар екі есеге артты. Бұл көрсеткіштер бүгінде кәсіпкерлердің белсенділігі төмендеп, еліміздің инвестициялық тартымдылығына кері әсер етіп жатқанын көрсетеді», – деді Олжас Құспеков.
Депутат Президенттің бастамасын қолдап, Үкімет пен Құрылтай бірлесіп, мораторийді 2027 жылғы 1 қаңтардан бастап енгізуге қажетті ұсыныстарды жақын арада әзірлей алады деген пікір білдірді.
Оның айтуынша, бұған дейінгі мораторий кезеңінде кәсіпкерлік белсенділік артып, ішкі инвестициялар көбейген, жаңа жұмыс орындары ашылып, салық базасы кеңейген.
«Бізде мораторий кезінде кәсіпкерлік қарқынды дамыған оң тәжірибе бар. Ішкі инвестициялар өсті, жұмыс орындары ашылды, салық базасы ұлғайды. Сондықтан бұл – оң қадам», – деп атап өтті депутат.
Дегенмен Олжас Құспеков мораторий барлық құқық бұзушылыққа бірдей қолданылмауы тиіс екенін айтты. Атап айтқанда, қаражатты заңсыз шетелге шығару және қылмыстық топтарды қаржыландыру сияқты ауыр экономикалық құқық бұзушылықтар мемлекеттік бақылауда қалуы қажет.
Ал заң талаптарын сақтайтын кәсіпкерлерге қатысты тексерулерді барынша қысқартып, олардың орнына цифрлық мониторинг жүйесін дамыту ұсынылды.
Сұхбат барысында журналистер жаңа Салық кодексі мен қосылған құн салығының 16 пайызға дейін көтерілуі туралы да сұрады.
Депутаттың пікірінше, салық реформасының нақты нәтижесін бағалауға әлі ерте. Ол үшін жыл қорытындысын күтіп, енгізілген өзгерістердің кәсіпкерлікке және экономикаға әсерін жан-жақты талдау қажет.
«Біз бұл реформаның нәтижесін әлі көрген жоқпыз. Ненің қаншалықты азайғанын немесе көбейгенін Үкімет әзірге айтпай отыр. Жыл аяқталуы керек. Содан кейін Үкіметтің есебін тыңдап, талдау жүргіземіз. Егер кемшіліктер анықталса, тиісті ұсыныстар енгіземіз», – деді Олжас Құспеков.
Сонымен қатар депутат салықтық әкімшілендіру жүйесін жетілдіру және кәсіпкерлерге қосымша тексеру жүргізбей-ақ, қаржылық операцияларды цифрлық бақылау мүмкіндіктерін кеңейту қажет екенін жеткізді.
Айта кетейік, бизнеске тексеру жүргізуге мораторий енгізу туралы түпкілікті шешім әзірге қабылданған жоқ. Президент бұл мәселені қарастыруды ұсынды, ал оны іске асыру мерзімі мен тетіктері алдағы уақытта нақтылануы тиіс.
