Келіссөз Қасым-Жомарт Тоқаевтың Түркияға ресми сапары аясында өтті. Алдымен президенттер шағын құрамда кездесті. Кейін екі елдің ресми делегациялары қатысқан кеңейтілген келіссөздер ұйымдастырылды.
Қазақстан Президенті Режеп Тайип Ердоғанға жылы қабылдауы үшін алғыс айтып, оны және түрік халқын алдағы Республика күнімен құттықтады. Тоқаев екі мемлекетті ортақ тарих, тіл мен дәстүр сабақтастығы және өзара сенім байланыстыратынын атап өтті.
«Біздің арамызда ешқандай қайшылық пен келіспеушілік жоқ. Елдеріміз екіжақты деңгейде де, халықаралық ұйымдар аясында да бір-біріне тұрақты қолдау көрсетіп келеді», – деді Қасым-Жомарт Тоқаев.
Мемлекет басшысының айтуынша, Түркия Қазақстанның ең ірі бес сауда серіктесінің қатарына кіреді. Сондай-ақ еліміздің экономикасына инвестиция құйған жетекші он мемлекеттің бірі саналады. Қазақстанда көптеген ірі түрік компаниясы табысты жұмыс істеп жатыр. Президент алдағы уақытта да түркиялық инвесторларға қолайлы жағдай жасалатынын жеткізді.
Өз кезегінде Режеп Тайип Ердоған Қазақстанмен стратегиялық серіктестікті одан әрі нығайтуға мүдделі екенін білдірді. Ол екі ел арасындағы экономикалық байланыстарды нақты жобалар арқылы дамыту қажеттігін атап өтті.
«Біз тауар айналымын 15 миллиард долларға дейін ұлғайтып, екіжақты қатынастардың инвестициялық бағытын жандандыруды көздеп отырмыз», – деді Түркия Президенті.
Кездесуде көлік және логистика, энергетика, ауыл шаруашылығы, жасанды интеллект және қорғаныс өнеркәсібі салаларындағы бірлескен жобалар талқыланды. Сонымен қатар президенттер мәдени-гуманитарлық ынтымақтастықты кеңейтуге назар аударды.
Режеп Тайип Ердоған Анкарада қазақ мемлекеттілігінің тарихына арналған «Құрылтай феномені» кітабы таныстырылғанын айтты. Бұдан бөлек, түркі халықтарының ортақ мұрасын дәріптейтін «Наурыз – түркі әлемінің ортақ мұрасы» еңбегі қазақ тіліне аударылғанын жеткізді. Түркия басшысы Қазақстан халқын өткен Республика күнімен де құттықтады.
Қасым-Жомарт Тоқаев биыл мамыр айында Ердоғанның Қазақстанға жасаған мемлекеттік сапарын еске алды. Сол кезде Жоғары деңгейдегі стратегиялық ынтымақтастық кеңесінің алтыншы отырысы өтіп, бірқатар маңызды құжатқа қол қойылған. Олардың қатарында Мәңгілік достық және кеңейтілген стратегиялық әріптестік туралы декларация да бар.
Келіссөз барысында мемлекет басшылары халықаралық және өңірлік күн тәртібіндегі өзекті мәселелер жөнінде пікір алмасты. Тоқаев келесі күні Ердоғанмен бірге Түркі мемлекеттері ұйымының XIII саммитіне қатысатынын хабарлады.
