«Социалистік әйелдер кеңестері» (SKM) қозғалысының өкілдері жас қазақстандықтың өмірі үзілген Шишли ауданындағы ғимаратқа жақын маңда митинг ұйымдастырды. Акцияға қатысушылар әйелдерге қарсы зорлық-зомбылыққа наразылық білдіріп, түрік полициясынан қыздың биіктен құлауына басқа адамдардың қатысы бар-жоғын мұқият тексеруді сұрады.
Еске салайық, Айсұлу Бекмаханова 25 қазан күні биіктен құлап, көз жұмған болатын. Түрік БАҚ-тарының мәліметінше, ол қайғылы оқиғаның алдында ғимараттың шатырында болған. Қазіргі таңда тергеушілер қыздың ол жерге қалай барғанын және не себепті құлағанын анықтап жатыр.
Тергеу барысында полиция марқұммен бірге тұрған 22 жастағы Ресей азаматынан және оның сүйіктісі делінетін 35 жастағы ер адамнан жауап алды. Кейін олардың екеуі де Түркия аумағынан шығуға тыйым салына отырып, сот бақылауымен босатылды.
Сонымен қатар, іс материалдарына бойжеткеннің соңғы жүріп-тұруын түсіріп алған бейнебақылау камераларының жазбалары тіркелді. Құқық қорғау органдары оның өлімінің нақты себептері туралы түпкілікті қорытындыны әлі жариялаған жоқ.
