26–30 қазан аралығында ҰҚШҰ-ның «Канал» өңірлік есірткіге қарсы операциясы аясында «Канал – Каспий шамшырағы» субөңірлік операциясы өтіп жатыр. Оған Қазақстан, Ресей, Беларусь, Қырғызстан және Тәжікстанның құзыретті органдары қатысуда.
Халықаралық операцияға Иран мен Қытай өкілдері бақылаушы ретінде тартылған. Сонымен қатар іс-шараға Орталық Азия өңірлік ақпараттық үйлестіру орталығы (ЦАРИКЦ), Қылмыстық кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық топ (ЕАГ) және ТМД-ға мүше мемлекеттердің кеден қызметтері өкілдері қатысып жатыр.
Операцияның басты мақсаты – есірткінің заңсыз айналымына тосқауыл қою, оны мемлекеттік шекаралар арқылы тасымалдау жолдарын анықтау және есірткі бизнесімен айналысатын ұйымдасқан қылмыстық топтардың қызметін тоқтату.
Осы мақсатта әуежайларда, теңіз және өзен порттарында, теміржол станциялары мен көлік тораптарында жедел-профилактикалық және тексеру шаралары жүргізіледі. Әсіресе халықаралық жүктер, жолаушылар багажы мен пошта жөнелтілімдері бақылауға алынады.
Бұдан бөлек, құқық қорғау органдары интернет пен ақпараттық технологиялар арқылы есірткі тарататын қылмыстық схемаларды анықтауға күш салады. Сондай-ақ қару-жарақ пен оқ-дәрілердің заңсыз айналымын тоқтату және есірткі саудасынан түскен қаражатты заңдастыру деректерін әшкерелеу көзделген.
Операция барысында қатысушы елдердің құзыретті органдары жедел ақпарат алмасып, трансұлттық есірткі тасымалына қарсы бірлескен іс-қимылды күшейтеді. Халықаралық операция 30 қазанда аяқталады.
