Қазақстанның Энергетика министрлігі сұйытылған мұнай газын, пропан мен бутанды ел аумағынан шығаруға қойылған тыйымды ұзартуды көздейтін бұйрық жобасын әзірледі. Құжат «Ашық НҚА» порталында жарияланды.
Жобаға сәйкес, 2026 жылғы 14 қарашадан бастап шектеуді тағы алты айға ұзарту ұсынылып отыр. Тыйым газды автомобиль және теміржол көлігі арқылы шетелге тасымалдауға қатысты болады.
Министрлік бұл шешімді ішкі нарықты жанармаймен тұрақты қамтамасыз ету қажеттілігімен түсіндіреді. Ведомствоның мәліметінше, экспортқа қойылған шектеу ел ішіндегі тұтынушыларға қажетті сұйытылған газ көлемін сақтауға мүмкіндік береді.
Дегенмен тыйым барлық тасымалдаушыларға бірдей қолданылмайды. Құжатта жекелеген жеткізушілерге, транзиттік тасымалдарға және заңнамада көзделген басқа да жағдайларға қатысты ерекшеліктер қарастырылған.
Айта кетейік, Қазақстанда сұйытылған газды экспорттауға шектеу 2026 жылдың мамырында енгізілген болатын. Енді оны 2027 жылдың мамырына дейін ұзарту ұсынылып отыр.
Бұйрық жобасы 12 қарашаға дейін қоғамдық талқылауда болады. Әзірге тыйымды ұзарту туралы түпкілікті шешім қабылданған жоқ.
