Қазақстанда ауыл тұрғындарының өз өнімдерін интернет арқылы сатып, кәсібін дамытуына мүмкіндік жасалмақ. Бұл туралы Үкімет отырысында Премьер-министрдің орынбасары – Жасанды интеллект және цифрлық даму министрі Жаслан Мәдиев мәлімдеді.
Жоспар бойынша ауыл кәсіпкерлері ірі интернет-дүкендер арқылы тауарларын сатуға мүмкіндік алады. Ол үшін тапсырыстарды қабылдап, тұтынушыларға беретін орындар көбейтіліп, шалғай ауылдарға дейін жеткізу қызметі ұйымдастырылады.
Сонымен қатар тұрғындарға интернетте сауда жүргізу, тауарларын онлайн ұсыну, цифрлық қызметтер мен жасанды интеллект мүмкіндіктерін пайдалану үйретіледі. Бұл ауылдағы кәсіп иелерінің тұтынушылар санын арттырып, табысын көбейтуіне жол ашуы тиіс.
Жаслан Мәдиевтің айтуынша, қазір елімізде 20-дан астам цифрлық қызмет арқылы 500 мыңнан астам қазақстандық табыс табуға мүмкіндік алып отыр.
Бұдан бөлек, азаматтарды жаңа кәсіпке бейімдеп, қажетті дағдыларды меңгеруге көмектесетін арнайы оқыту жүйесін іске қосу көзделген. Ол жұмыспен қамту саласындағы мемлекеттік жүйелермен байланыстырылмақ.
Қазір министрлік осы бастамаларды сынақтан өткізуге арналған жобаларды әзірлеп жатыр. Әзірге олардың қашан іске қосылатыны және қай ауылдар қамтылатыны белгісіз.
