Ақтөбе облысының табиғат қорғау прокуратурасы пайдалы қазбаларды өндірумен айналысатын компаниялар тарапынан салық заңнамасының өрескел бұзылғанын анықтады. SHYNDYK.KZ хабарлағандай, 2022-2025 жылдар аралығында жер қойнауын пайдаланушылар 127 келісімшарт бойынша салықтық міндеттемелерін толық орындамаған. Салдарынан мемлекет алдындағы жалпы қарыз сомасы 1,2 миллиард теңгеден асып түсті.
Қадағалау органының тікелей араласуынан кейін бюджетке 600 миллион теңгеден астам қаражат қайтарылды. Бұған қоса, 29 компания жалпы сомасы 250 миллион теңгені құрайтын қосымша салық декларацияларын өз еркімен тапсырып, қарыздарын өтеуге кірісті.
Кешенді тексеру қорытындысы бойынша қызметтік міндеттерін тиісінше орындамағаны және салғырттық танытқаны үшін жергілікті салық қызметінің үш қызметкері тәртіптік жауапкершілікке тартылды.
