Күмәнді транзакциялар бірден бірнеше блокчейн желісінде тіркелген. Аударылған активтердің қатарында Bitcoin, Ethereum криптовалюталары, сондай-ақ USDT және USDC стейблкоиндері бар. Әзірге келтірілген шығынның нақты көлемі мен қаражаттың қандай жағдайда шығарылғаны анықталып жатыр.
Соңғы мәліметтерге сәйкес, 2,54 млрд доллар көлеміндегі активтер бұғатталған. Қаражатты бұғаттауға Tether және Circle компаниялары қатысқан. Binance күмәнді операцияларды қадағалау үшін құқық қорғау органдары мен блокчейн сарапшыларын тартқан. Тексеру кезінде биржа қаражат шығаруға уақытша шектеу қойып, Binance Alpha платформасындағы сауданы тоқтатқан.
Binance компаниясының негізін қалаушылардың бірі И Хэ кибершабуыл салдарынан туындаған барлық шығынды компания өтейтінін мәлімдеген. Биржа өкілдері пайдаланушылардың қаражаты қауіпсіз жерде екенін айтып, тергеу жалғасып жатқанын жеткізген.
Ықтимал кибершабуыл туралы ақпарат тарағаннан кейін криптовалюта нарығында баға төмендеген. 30 қазанда Bitcoin құны 77 646 долларға дейін түсіп, соңғы алты аптадағы ең төменгі деңгейге жеткен. Ethereum бағасы 2 238,76 долларға дейін арзандаса, BNB токені бір тәулікте 8 пайыздан астам құнын жоғалтқан.
Бұған дейін криптовалюта биржаларына жасалған ең ірі расталған кибершабуыл 2025 жылғы ақпанда Bybit платформасында тіркелген еді. Сол кезде хакерлер шамамен 1,5 млрд доллардың цифрлық активтерін ұрлаған. Binance биржасына қатысты болжамды шығын бұл көрсеткіштен үш еседен астам жоғары. Алайда оқиғаның нақты ауқымы тергеу аяқталып, ақпарат ресми расталғаннан кейін белгілі болады.
