Оқиға 2026 жылғы 9 шілдеде болған. Байтеновтің сөзінше, аптап ыстыққа қарамастан, жолаушылар ұшақ салонында салқындату жүйесінсіз отыруға мәжбүр болған. Кейін ол сотқа жүгініп, болған жағдайды растайтын бейнежазбаларды дәлел ретінде ұсынған. Ал әуе компаниясы, талапкердің айтуынша, қандай да бір заңбұзушылық болғанын жоққа шығарған.
Байтенов сотқа «Қазгидрометтің» ресми жауабын да ұсынған. Құжатқа сәйкес, 9 шілдеде Шымкентте сағат 17:00 мен 20:00 аралығында ауа температурасы 36–36,2 градус болған.
Бірінші сатыдағы сот жолаушының пайдасына шешім шығарып, FlyArystan компаниясынан моральдық зиян үшін 200 мың теңге, өкілдің қызметіне жұмсалған шығын үшін 500 мың теңге өндіруді ұйғарған. Бұдан бөлек, әуе компаниясына өзге де сот шығындарын өтеу міндеттелген.
Алайда сот шешімі әзірге түпкілікті емес. Аблай Байтеновтің айтуынша, іс алдағы уақытта апелляциялық сатыда қаралады.
