Белгілі болғандай, 1980 жылы әйелдің анасы оның туу фактісін АХАЖ органдарында тіркемеген. Кейіннен бұл мәліметтерді соттан тыс тәртіппен қалпына келтіру мүмкін болмады, өйткені сол кезеңдегі медициналық мұрағаттар сақтау мерзімінің өтуіне байланысты жойылған.
ЖСН-нің болмауы азаматшаны сотқа өз бетінше жүгіну мүмкіндігінен айырған. Оның үстіне, бұған дейін оның әпкесі берген өтініш те оң шешімін таппаған еді.
Алатау қаласының прокуратурасы тұрғынның құқықтарын қорғау мақсатында туу фактісін анықтау туралы талап-арызбен сотқа жүгінді. Сот қадағалау органының талаптарын толық қанағаттандырды. Енді 46 жастағы әйел жеке куәлігін рәсімдеп, медициналық көмек алуға, ресми түрде жұмысқа орналасуға және мемлекеттік әлеуметтік қолдау шараларына заңды түрде қол жеткізе алады.
