Қайғылы оқиға 29 қазанда сағат 15:15 шамасында Гёреме ашық аспан астындағы музейінің кіреберісіне жақын жерде болған. Жартастан бөлінген ірі тас кесектері сол маңда жүрген адамдардың үстіне құлаған. Алдын ала болжам бойынша, нөсер жауын салдарынан жер көшкіні жүріп, жартас опырылған болуы мүмкін.
Түркиялық БАҚ мәліметінше, қаза тапқандардың арасында 31 жастағы журналист Фатих Эрай Туна мен оның жұбайы, 31 жастағы Бегюм Четинкая Туна бар. Ерлі-зайыптылар төрт ай бұрын ғана үйленіп, Каппадокияға демалуға келген. Қаза тапқандардың қатарында Францияның 37 жастағы азаматшасы бар.
Оқиға салдарынан тағы бес адам жарақат алған. Олардың арасында үш және сегіз жастағы екі бала бар. Соңғы мәлімет бойынша, зардап шеккен төрт адам ауруханадан шығарылған. Ал жамбас сүйегі сынған тағы бір адам ем қабылдап жатыр.
Оқиға орнына құтқарушылар, полиция қызметкерлері мен дәрігерлер жұмылдырылды. Іздестіру-құтқару жұмыстары аяқталған. Адам өліміне байланысты прокуратура тергеу бастады. Мамандар жартастың опырылуына нақты не себеп болғанын анықтайды.
Каппадокия — Түркиядағы ең танымал туристік аймақтардың бірі. Бұл өңір мыңдаған жыл бойы табиғи эрозия әсерінен қалыптасқан ерекше жанартаулық жартастарымен әйгілі. Оларды жергілікті жерде «ертегі мұржалары» деп атайды. Жыл сайын Каппадокияға әлемнің түкпір-түкпірінен туристер келеді.
