Президенттің айтуынша, биыл Қазақстанның ТМҰ-ға мүше мемлекеттермен тауар айналымы 40 пайызға өсіп, 10 миллиард долларға жуықтаған. Мемлекет басшысы экономикалық байланысты одан әрі нығайту үшін ұйымның 2027–2031 жылдарға арналған бес жылдық стратегиясын қабылдауды жеделдету қажет екенін айтты. Сонымен қатар Түркі инвестициялық қорының мүмкіндіктерін тиімді пайдаланып, 2027 жылы Қазақстанда ірі іскерлік форум өткізуді ұсынды.
Тоқаев Таяу Шығыстағы геосаяси ахуалдың шиеленісуіне де назар аударды. Оның сөзінше, аймақтағы тұрақсыздық әлемдік саудаға және түркі мемлекеттерінің көлік-логистика байланыстарына кері әсерін тигізіп отыр. Осыған байланысты Қазақстан хуситтердің Сауд Арабиясына жасаған негізсіз шабуылдарын қатаң айыптап, мұндай заңсыз әрекеттерді тоқтату жөніндегі үндеулерді қолдайтынын мәлімдеді.
Мемлекет басшысы көлік саласындағы әріптестікті кеңейтуді басты міндеттердің бірі ретінде атады. Биылғы тоғыз айда Транскаспий халықаралық көлік бағыты, яғни Орта дәліз арқылы тасымалданған жүк көлемі 30 пайызға, ал транзиттік тасымал 90 пайызға артқан. Қазақстан мен ТМҰ елдері арасындағы теміржол тасымалы 40 миллион тоннаға жуықтаса, автомобиль көлігімен жеткізілген жүк көлемі 6,5 миллион тоннаға жеткен. Қазақстан алдағы уақытта осы бағыттағы инфрақұрылымды ауқымды түрде жаңғыртуды жоспарлап отыр. Сонымен бірге «Солтүстік – Оңтүстік» дәлізі мен «Бір белдеу, бір жол» жобасы да еліміз үшін маңызды бағыттар болып қала бермек.
Саммит барысында Тоқаев «Түркі мемлекеттері ұйымы +» форматының маңызын атап өтіп, Ресейді осы бастамаға қосылуға шақыруды немесе ұйым қызметіне бақылаушы ретінде қатыстыруды ұсынды. Президент Ресей мен түркі әлемін ғасырлар бойғы тарихи және тілдік байланыстар біріктіретінін, сондай-ақ Ресей аумағында көптеген түркі халықтары тұратынын айтты. Бұдан бөлек, Қазақстан Ресей қолға алған «Алтай – түркі өркениетінің бесігі» жобасын қолдайтынын жеткізді. Мемлекет басшысының пікірінше, Ресейдің ТМҰ қызметіне қатысуы барлық мүше мемлекетке тиімді болмақ.
Биылғы саммит «Түркі ғасыры: тіліміз де, ойымыз да, ісіміз де – бір» тақырыбымен, Бірінші Түркология құрылтайының 100 жылдығы аясында өтіп жатыр. Тоқаев Түркия президенті Режеп Тайип Ердоғанның бастамасымен ашылған Түркі мемлекеттері ұйымы аллеясына да тоқталды. Оның айтуынша, жаңа аллея түркі халықтарының рухани бірлігі мен мызғымас бауырластығының символына айналады.
