Ақтауда 14 әскери қызметшінің қаза тапқанына қырық күн толды. Қайғылы жағдай құрбандарын еске алу мақсатында қазақстандықтар құдайы тамақ беріп, марқұмдардың рухына құран бағыштады. Желі қолданушылары қыршын кеткен жігіттердің суреттерінен коллаждар жариялап, әрбір үзілген жас ғұмырдың артында орны толмас қайғы мен аңырап қалған отбасы қалғанын жазуда.
Еске салайық, Маңғыстау облысындағы төтенше оқиға 24 қыркүйекте болған еді. Каспий теңізінің акваториясында оқу-жауынгерлік тапсырманы орындау кезінде ауа райы күрт бұзылып, дауылды желдің салдарынан бір топ әскери қызметшіні ашық теңізге ағызып әкеткен. Қайғылы оқиға салдарынан 14 сарбаз көз жұмып, үшеуі аман қалды. Аталған жағдайға байланысты 25 қыркүйек Қазақстанда Жалпыұлттық аза тұту күні болып жарияланған болатын.
