Полиция мәліметінше, күдікті есірткі өндіретін орынды көпқабатты үйдің ең жоғарғы қабатынан әдейі таңдаған. Ол химиялық заттардың өткір иісін көршілерінен жасыру үшін зертхананың ауа сорғышын үйдің ортақ желдету жүйесіне қосқан.
Пәтерді тінту барысында полицейлер зертханалық ыдыстар, электронды таразылар, қорғаныш құралдары, кристалл тәрізді зат салынған алты шыны науа, дихлорметан құйылған алты бөтелке және химиялық реагенттер сақталған тоғыз канистр тапты.
Сондай-ақ сатуға дайын бір келі есірткі тәркіленді. ІІМ мәліметінше, табылған есірткі заттарының жалпы салмағы 4,5 келіге жеткен.
Аталған дерек бойынша Қазақстан Республикасы Қылмыстық кодексінің 297-1-бабымен сотқа дейінгі тергеу басталды. Күдіктіге өмір бойына бас бостандығынан айыру жазасы тағайындалуы мүмкін.
Есірткінің кімдерге сатылғаны және заңсыз өндіріске өзге адамдардың қатысы бар-жоғы әзірге белгісіз.
