29 қазанда Binance криптовалюта биржасына ауқымды кибершабуыл жасалды. Салдарынан шамамен 6,3 миллиард доллардың цифрлық активтері ұрланған. Компанияның мәліметінше, хакерлер биржаның интернетке қосылған криптоәмияндарына заңсыз қол жеткізген.
2 қарашада жарияланған ресми ақпаратқа сәйкес, Binance зардап шеккен активтердің шамамен 95%-ын қайта қамтамасыз етті. Бұл ұрланған қаражаттың түгелдей қайтарылғанын білдірмейді. Компания жетіспейтін активтерді өз қаражаты мен резервтік қорлары есебінен толықтырып жатыр.
Биржа Bitcoin, Ethereum, USDT, BNB, Solana және тағы бес криптовалюта бойынша резервтердің толық қалпына келтірілгенін хабарлады. Енді пайдаланушылар өз активтерінің кемінде 1:1 арақатынасында қамтамасыз етілгенін Proof of Reserves жүйесі арқылы тексере алады.
Ал қалған 5% негізінен нарықта айналымы аз цифрлық токендерге тиесілі. Оларды қажетті көлемде сатып алу үшін қосымша уақыт керек. Компания бұл бағыттағы жұмысты жалғастырып жатқанын мәлімдеді.
Кибершабуылдан кейін Binance қауіпсіздік шараларын күшейтіп, ұрланған қаражаттың қозғалысын бақылауға алды. Компанияның хабарлауынша, блокчейн желілерінде шамамен 3 миллиард доллардың активтері бұғатталған. Сонымен қатар уақытша шектелген криптовалюта шығару операциялары кезең-кезеңімен қалпына келтіріліп жатыр.
Binance ұрланған қаражаттың қаржылық салдарын пайдаланушыларға жүктемейтінін мәлімдеді. Кибершабуылдың мән-жайын анықтау жұмыстары жалғасуда. Компания 4 қарашада резервтерге қатысты кезекті тексеру жүргізуді жоспарлап отыр.
