Dostlik Cup халықаралық футбол фестивалі кезінде тамақтан уланған 17 қазақстандық азамат Ташкенттегі ауруханада ем қабылдауды жалғастыруда. Қазақстанның Өзбекстандағы елшілігінің мәліметінше, барлық науқастардың жағдайы тұрақты, оларға қажетті медициналық көмек толық көлемде көрсетіліп жатыр.
Ауруханаға түскендердің жағдайын білу үшін қазақстандық дипломаттар арнайы барды. Консул Сәкен Пердебеков зардап шеккендерге қолдау көрсетіп жүр. Сондай-ақ, бұл мәселе екі елдің Денсаулық сақтау министрлерінің тікелей бақылауына алынған.
Дегенмен, спортшылардың денсаулығынан бөлек, қазақстандық балалар жатқан мекеменің жай-күйі қоғамда жаңа сұрақтар туындатты. Желіде тараған аурухана ішіндегі суреттер мен видеолар тіпті Өзбекстан азаматтарының да ашуын келтірген. Қолданушылар мемлекеттік медициналық мекеменің антисанитариялық жағдайына наразылық білдіріп, Өзбекстанның Денсаулық сақтау министрлігін ауруханалардың жағдайына шұғыл назар аударуға шақыруда.
