Желіде 079RRK01 және 079KZZ01 мемлекеттік тіркеу нөмірлері бар қос «Гелендваген» жүргізушілерінің жолдағы әрекеті қызу талқыға түсті. Ролик авторының айтуынша, жол талғамайтын көлік тізгіндегендер жолақ сызықтарын кесіп өтіп, бұрылыс сигналдарын қоспай, басқа жүргізушілер үшін аса қауіпті жағдай туғызған.
Видео қазақстандықтардың қатаң сынына ұшырады. Желі қолданушылары кейбір жүргізушілердің неліктен мұндай бассыздыққа жол беретінін және бұл әрекеттері жазасыз қала ма деген сауалды төтесінен қойып жатыр.
Екі көлікте де Астана қаласына тиесілі «01» аймақ нөмірі тағылған. Алайда оқиғаның нақты қай жерде және қай қалада түсірілгені әзірге белгісіз.
Бұл мәселенің мән-жайын білу мақсатында Астана қаласының Полиция департаментіне ресми сауал жолданды. Құзырлы органнан жүргізушілердің жеке басы анықталған-анықталмағаны, олардың заң алдында жауапқа тартылатыны, сондай-ақ заңбұзушылықтың елорда аумағында болған-болмағаны туралы ақпарат сұратылды.
