Мемлекет басшысына ұлттық компанияның даму барысы, халықаралық нарықтағы позициясын нығайту және стратегиялық жобаларды іске асыру жұмыстары туралы баяндалды.
Атап айтқанда, 2026 жылы «Қазатомпром» Үндістан мен Қытайдың ірі энергетикалық компанияларымен табиғи уран жеткізу жөнінде жаңа келісімшарттарға қол қойды.
Сонымен қатар, компания уранның мемлекеттік стратегиялық резервін құру бағытында жұмыс істеп жатыр. Қазіргі таңда жалпы аумағы 1 мың шаршы шақырымнан асатын алты учаскеде геологиялық барлау жүргізілуде. Бұдан бөлек, аумағы 124 шаршы шақырымды құрайтын перспективалы Қызылту учаскесінде барлау жұмыстарын бастау жоспарланған.
Кездесу барысында уран өндіру технологияларын дамытуға және сирек кездесетін жер металдарын ілеспе түрде өндіруге бағытталған зерттеулерге айрықша назар аударылды.
Әлеуметтік және инфрақұрылымдық жобалар аясында 2026 жылы «Қазатомпром» денсаулық сақтау, білім беру және спорт салаларын дамытуға 13 млрд теңгеден астам қаражат бөлді.
Кездесу қорытындысы бойынша Қасым-Жомарт Тоқаев ресурстық базаны кеңейту, халықаралық ынтымақтастықты одан әрі дамыту және әлеуметтік бастамаларды іске асыру жұмыстарын жалғастыруды тапсырды.
