Қазақстанның денсаулық сақтау министрі Ақмарал Әлназарова Ақтаудағы Маңғыстау облыстық көпбейінді балалар ауруханасында болған жанжалға қатысты пікір білдірді. Аталған медициналық мекемеде бес жасар науқастың әкесі балалар хирургіне күш қолданған.
Журналистер министрден медицина қызметкерлеріне шабуыл жасағандарға жазаны күшейту науқастардың дәрігер қателігі немесе заңбұзушылық туралы шағымдануына кедергі келтірмей ме деп сұрады.
Ақмарал Әлназарова медициналық көмектің сапасына қатысты шағымдар дәрігерге күш қолдануды ақтай алмайтынын атап өтті.
«Адам жұмыс орнында өзінің кәсіби міндетін атқарып жатыр. Сіз дәл сол сәтте оған шабуыл жасап, ұрып-соғып, жұлқылауды дұрыс деп санайсыз ба?» – деді министр.
Оның айтуынша, Ақтаудағы оқиға бойынша қылмыстық іс қозғалған. Жанжалға қатысқан барлық адамның әрекетіне тергеу барысында құқықтық баға беріледі. Егер дәрігер тарапынан заңбұзушылық анықталса, ол да назардан тыс қалмайды.
Министрдің мәліметінше, 2026 жылдың сәуірінде медицина қызметкерлеріне шабуыл жасағаны үшін жауапкершілік күшейтілгеннен бері Қазақстанда тиісті бап бойынша 50-ге жуық қылмыстық іс қозғалған.
Еске салайық, оқиға 31 қазанда Ақтаудағы балалар ауруханасында болған. Жанжалдан кейін тараптар болған жағдайға қатысты әртүрлі мәлімет таратты.
Баланың әкесі ұлына медициналық көмек көрсетілуін талап еткенін, алайда дәрігер тарапынан тиісінше қарым-қатынас көрмегенін мәлімдеді.
Ал аурухана басшылығы ата-ананың 22 және 25 қазанда баланы стационарға жатқызудан екі рет жазбаша бас тартқанын хабарлады. Сондай-ақ медициналық мекеме өкілдері бейнебақылау камераларының жазбаларын қарап, хирург тарапынан медициналық әдеп талаптарының бұзылғанын анықтамағандарын айтты.
Оқиғаның нақты мән-жайы тергеу барысында анықталады.
