Ұсынылып отырған өзгерістер туралы 4 қарашада Құрылтай депутаты Бота Елеусізова мәлімдеді. Ол «Қазақстан Республикасының кейбір заңнамалық актілеріне ветеринария мәселелері бойынша өзгерістер мен толықтырулар енгізу туралы» заң жобасына қатысты қосымша баяндама жасады.
Заң жобасына сәйкес, қоғамдық тамақтану орындарына арналған ауыл шаруашылығы жануарларын арнайы белгіленген нысандардан тыс жерде союға тыйым салу көзделген. Сонымен қатар ветеринариялық-санитариялық сараптамадан өтпеген жануарлардан алынған өнімдер мен шикізатты, сондай-ақ сою алдындағы ветеринариялық тексеруден өтпеген малдың етін кафе мен мейрамханаларда пайдалануға шектеу қою ұсынылып отыр.
Тағы бір өзгеріс мал сою алаңдарына қатысты. Заң жобасында оларды мал союға рұқсат етілген орындар тізімінен алып тастау қарастырылған. Бұл талапты енгізу үшін өтпелі кезең белгілеу ұсынылады. Алайда оның нақты мерзімі депутаттың баяндамасында айтылмады.
Айта кетейік, сатуға арналған малды союға қатысты бірқатар талап қазір де қолданыста бар. Ветеринариялық қағидаларға сәйкес, жануарлар сою алдында міндетті тексеруден, ал алынған өнімдер ветеринариялық-санитариялық сараптамадан өтуі тиіс. Жаңа түзетулер осы бақылауды, әсіресе қоғамдық тамақтану саласында, одан әрі күшейтуге бағытталған.
Бұдан бөлек, ветеринариялық құжаттары жоқ жануарлардан алынған өнімдерді тасымалдау кезінде уақытша алып қоюға рұқсат беру ұсынылды. Мұндай шара өнімді тексеру, диагностикалау немесе сараптамадан өткізу кезеңінде қолданылуы мүмкін.
Бота Елеусізованың айтуынша, өзгерістер азық-түлік қауіпсіздігін қамтамасыз етуге, жануарлар ауруларының алдын алуға және халық денсаулығын қорғауға бағытталған.
Заң жобасы Құрылтайдың бірінші оқылымына ұсынылды. Бейінді комитет депутаттарға құжатты мақұлдауды ұсынған. Әзірге аталған шектеулер заңды күшіне енген жоқ. Олар заң жобасы түпкілікті қабылданғаннан кейін ғана қолданысқа енгізілуі мүмкін.
