Фракция мәліметінше, кәсіпкерлер алдын ала операторлармен келісімшарт жасайды. Онда жүкті аударып тиеу құны бір контейнер үшін 90 доллардан аспайды деп анық көрсетіледі. Алайда іс жүзінде жүктер станциядан 10 шақырым қашықтықта орналасқан басқа терминалға өз бетімен жіберіледі. Салдарынан бизнесмендерге әр контейнер үшін 205 доллардан 235 долларға дейін артық ақша төлеуге тура келеді.
Станция басшылығы бұл әрекеттерін «жүкті біркелкі бөлу» қажеттілігімен түсіндірген. Бірақ статистика мүлдем басқа жағдайды көрсетіп отыр: жүктердің басым бөлігі ең қымбат қызмет көрсететін операторға жіберілетіні анық байқалады.
Асылхан Қожахметов мұндай тәжірибе Мемлекет басшысының елдің транзиттік әлеуетін дамыту жөніндегі тапсырмаларына қайшы келетінін және кәсіпкерлердің қалтасына айтарлықтай нұқсан келтіретінін баса айтты.
Осыған байланысты депутат қадағалау органдарынан «Достық» станциясы лауазымды тұлғаларының әрекетіне құқықтық баға беріп, негізсіз артық төлемдерді тоқтатуды және контейнерлерді бөлуде ашықтықты қамтамасыз етуді сұрады.
