Депутаттың айтуынша, бүгінде кәсіпкерлер үшін жұмыс істеп тұрған зауытты жаңғыртудан (олар үшін мемлекеттік қолдау шегі қолдан 5 млн АЕК-ке дейін көтерілген) гөрі, нөлден бастап жаңа өндіріс ашқан (шегі — 2 млн АЕК) әлдеқайда тиімді. Осының кесірінен жұмыс орындарын ашып, өнім шығарып отырған отандық кәсіпорындар жаңа инвесторлармен салыстырғанда теңсіз жағдайда қалып отыр.
Депутат көтерген екінші жаһандық мәселе — кепілдендірілген өткізу нарығының жоқтығы және шетелдік компанияларды бюджет есебінен қолдау. Ахметжаев Президенттің Ұлттық қор қаражатын шетелдік тауарларға жұмсамау туралы тікелей тапсырмасын еске салды. Алайда іс жүзінде мемлекеттік сатып алуларда әлі де импортқа басымдық беріліп, миллиардтаған теңге шетелге ағып жатыр.
Қазақстандық өндірушілерді бұл тығырықтан шығару үшін депутат бірқатар түбегейлі шараларды ұсынды: жұмыс істеп тұрған зауыттар үшін инвестициялық шекті 1 миллион АЕК-ке дейін төмендету, нарықты импорттың демпингтік бағаларынан қатаң қорғау және отандық бизнеске мемлекеттік сектордың, ұлттық компаниялар мен ірі жер қойнауын пайдаланушылардың сатып алуларына басымдықпен қатысуға кепілдік беретін тетіктерді енгізу.
