Әлеуметтік желіде тараған бейнежазбада бірнеше адамның бір жігітке қайта-қайта соққы жасап жатқаны көрінеді. Оқиға куәгерлері оларды тоқтатуға тырысып, полиция шақыратынын айтып айқайлаған. Алайда төбелеске қатысушылар бұған назар аудармаған.
Соққының салдарынан жігіт жерге құлап түседі. Кейін бейнежазбада оның өздігінен орнынан тұрғаны байқалады. Зардап шегушінің қандай жарақат алғаны және қазіргі жағдайы туралы әзірге мәлімет жоқ.
SHYNDYK.KZ редакциясы оқиғаға қатысты Тараз полициясынан ресми түсініктеме сұрады. Құқық қорғау органдары аталған дерек бойынша қылмыстық іс қозғалғанын растады.
«Төбелеске қатысушылардың барлығы анықталып, полиция бөліміне жеткізілді. Қазіргі уақытта оқиғаның барлық мән-жайын анықтауға бағытталған қажетті тергеу амалдары жүргізіліп жатыр», — деп хабарлады полиция.
Жанжалдың неден шыққаны, оған нақты қанша адам қатысқаны және олардың іс жүргізу мәртебесі әзірге жарияланған жоқ. Тергеу жалғасып жатыр.
