Құқық қорғау органдарының мәліметінше, қаскөй медициналық техниканың Қазақстанда өндірілгені туралы жалған құжаттарды ұсыну арқылы отандық тауар өндіруші мәртебесін заңсыз алған. Іс жүзінде шетелдік бөлшектерден құрастырылған жабдықтар ауруханаларға жергілікті өнім ретінде сатылып келген.
Мемлекетке миллиардтаған шығын әкелген алаяқтық әшкереленгеннен кейін, күдікті қылмыстық қудалау органдарынан жасырынып, оған халықаралық іздеу жарияланған болатын. Осы жылдың наурыз айында ер адам Грузия аумағында ұсталып, күні кеше елге экстрадицияланды.
Қазіргі уақытта күдікті тергеу изоляторына қамалды. Аса ірі мөлшердегі алаяқтық, сондай-ақ жалған медициналық бұйымдарды өндіру және өткізу баптары бойынша оған мүлкін тәркілеумен бірге 10 жылға дейін бас бостандығынан айыру жазасы төніп тұр.
