Мемлекет басшысының тапсырмасына сәйкес, Министрлер кабинеті бір ай ішінде энергетикалық сусындарға тыйым салу мүмкіндігін зерделеуі тиіс. Ал алдағы алты айда қажетті реттеу шараларын қабылдау көзделген.
Садыр Жапаров мұндай бастаманы халықтың, әсіресе жастардың денсаулығына алаңдаушылықпен түсіндірді. Оның айтуынша, энергетикалық сусындарды шамадан тыс тұтыну жүрек-қан тамырлары жүйесіне, бүйрекке және зат алмасу процесіне кері әсер етуі мүмкін. Президент мұндай сусындарды көп тұтынумен байланысты ауруларды емдеуге мемлекет қомақты қаржы жұмсайтынын да атап өтті.
Президент келтірген мәліметке сүйенсек, 2025 жылы Қырғызстан тұрғындары 54,2 миллион литр энергетикалық сусын тұтынған. Бұл шамамен 129 миллион құтыға тең. Ал 2026 жылдың алғашқы алты айында тұтыну көлемі 36,1 миллион литрге жеткен.
Өткен жылы елде 25,3 миллион литр энергетикалық сусын өндірілсе, тағы 29,7 миллион литрге жуығы шетелден әкелінген.
Энергетикалық сусындарға толық тыйым салынған жағдайда, Қырғызстан бюджеті салық және кедендік түсімдерден шамамен 1,5 миллиард сом жоғалтуы мүмкін. Алайда Садыр Жапаров халық денсаулығы экономикалық кірістен маңызды екенін мәлімдеді.
Айта кетейік, Қырғызстанда 2023 жылдың шілдесінен бастап энергетикалық сусындарды жарнамалауға тыйым салынған. Енді билік оларды өндіру мен елге әкелуді толық тоқтату мүмкіндігін қарастырып жатыр.
