Қазір елімізде адам папилломасы вирусына қарсы төрт валентті «Гардасил» вакцинасы қолданылып келеді. Ал жаңа «Гардасил 9» препараты вирустың тоғыз түрінен, соның ішінде қатерлі ісіктің дамуына ықпал ететін жеті түрінен қорғайды.
Қазақстанда 11–13 жас аралығындағы қыздарға АПВ-ға қарсы вакцина тегін салынады. 2026 жылдың мамыр айынан бастап екпе алу бағдарламасы кеңейтіліп, оған 14–17 жас аралығындағы жасөспірім қыздар да енгізілді.
Вакцинация мектептердің медициналық кабинеттерінде және емханаларда жүргізіледі. Екпе ерікті түрде, ата-анасының немесе заңды өкілінің келісімімен ғана салынады.
Әзірге «Гардасил 9» вакцинасының Қазақстанда нақты қашан қолданыла бастайтыны жарияланған жоқ. Алдағы уақытта билік адам папилломасы вирусына қарсы екпе алу бағдарламасына ұл балаларды да қосуды жоспарлап отыр.
Адам папилломасы вирусы жатыр мойны обырының дамуына әкелетін негізгі себептердің бірі саналады. Вакцинация вирустың қауіпті түрлерін жұқтыру және олармен байланысты қатерлі ісік ауруларының даму қаупін едәуір төмендетеді.
