Жаппай наразылыққа Threads әлеуметтік желісінде қалдырылған пікірдің скриншоты себеп болды. Желі қолданушыларының айтуынша, бұл қорлайтын сөздер Ашаршылық зұлматынан аман қалғандардың ұрпақтарына бағытталған. Желіде қатыгез пікірдің авторы Қостанай облысы Рудный қаласының тұрғыны, блогер әйел екендігі туралы ақпарат қызу талқылануда. Алайда оның жеке басы әлі ресми түрде расталған жоқ.
Бұл мәлімдеме қазақстандықтардың жанына қатты батты. Қолданушылар 1930-жылдардағы сан мыңдаған адамның өмірін қиған трагедия ел тарихындағы ең ауыр әрі қаралы беттердің бірі екенін еске салып, мұндай пікірді қатаң айыптады.
Қазіргі уақытта құқық қорғау органдарына ресми арыз түскен-түспегені және жарияланған пікірде құқық бұзушылық белгілерінің бар-жоғы белгісіз.
Мән-жайды анықтау үшін SHYNDYK.KZ редакциясы Қостанай облысының Полиция департаментіне ресми сауалнама жолдады. Біз аталған факті бойынша шағымдардың тіркелген-тіркелмегенін, тексеру амалдарының басталғанын және бұл даулы сөздерге құқықтық баға берілетін-берілмейтінін нақтылауды сұрадық.
