Жасөспірім №1 қалалық балалар клиникалық ауруханасына өте ауыр жағдайда жеткізілген. Дәрігерлер оның бас сүйегі мен миы жарақаттанғанын, миы соғылғанын, кеуде қуысы мен ішкі ағзалары зақымданғанын анықтады. Сонымен қатар баланың аяқ-қолдары бірнеше жерден сынып, жарақат салдарынан шок алған.
Алғашқы екі тәулікте дәрігерлер баланың жағдайын тұрақтандыру үшін күресті. Өмірлік маңызды көрсеткіштері қалыпқа келгеннен кейін хирургиялық емдеу шаралары басталды.
Жасөспірімге төрт күрделі операция жасалды. Барлық хирургиялық ота сәтті аяқталды. Медицина қызметкерлерінің күш-жігерінің арқасында баланың жағдайы біртіндеп жақсара бастады.
Ұзақ уақыт ем қабылдап, дәрігерлердің бақылауында болған жасөспірім ауруханадан шығарылды. Алайда оның толық сауығуы үшін емдеу шаралары жалғасады. Желтоқсан айында бала қозғалыс қабілетін қалпына келтіруге бағытталған оңалту курсынан өтеді.
