Бұған дейін 11-сынып оқушысы Айханым Оқасова Гарвард университетінің Harvard Extension School бөлімшесіне толық грантпен оқуға түскенін айтқан. Сондай-ақ тоғыз тіл меңгергенін, жүздеген адамға тіл үйреткенін және Ailingo білім беру платформасын құрғанын мәлімдеген.
Алайда көп ұзамай оның жетістіктеріне қатысты әлеуметтік желіде күмәнді пікірлер пайда болды.
Threads желісінде Даниял Сүлеймен есімді қолданушы оқушы жариялаған құжаттарды тексергенін мәлімдеді.
Оның айтуынша, Айханым түстім деген Bachelor of Liberal Arts бағдарламасына мектеп бітіргеніне кемінде бес жыл болған адамдар ғана қабылданады. Демек, қазір 11-сыныпта оқып жүрген жасөспірім бұл талапқа сай келмейді.
Бұдан бөлек, ол оқушы алғанын айтқан International Student Scholarship стипендиясының аталған бөлімшеде қарастырылмағанын алға тартты.
Даниял Гарвард университетіне хабарласып, Айханым жариялаған қабылдау хатын тексеруге жібергенін айтады. Оның сөзінше, университет өкілдері құжаттың түпнұсқа емес екенін хабарлаған.
Осыған ұқсас жағдай Миннесота университетіне қатысты да туындаған. Желі қолданушысының мәлімдеуінше, оқу орнының өкілдері оқуға қабылдау туралы хатты растамаған. Құжат жасанды интеллект көмегімен дайындалуы мүмкін деген болжам да айтылған.
Дегенмен университеттерден келген жауаптардың шынайылығы әзірге тәуелсіз түрде расталған жоқ.
Желі қолданушылары Айханымның FLEX халықаралық алмасу бағдарламасына қатысқаны туралы мәлімдемесіне де назар аударды.
Оқушы жариялаған құжат, сын айтушылардың пікірінше, оның бағдарламаға өтінім бергенін ғана көрсетеді. Ал бұл конкурстық іріктеуден өтіп, АҚШ-та білім алғанын білдірмейді.
Қытай тіліне қатысты сертификат та талқылауға түсті. Айханым көрсеткен Chinese for HSK 5 құжаты халықаралық емтихан нәтижесі емес, Coursera платформасындағы онлайн курсты аяқтағаны туралы сертификат болуы мүмкін.
Сонымен қатар корей тілін меңгерген желі қолданушылары оқушының осы тілдегі жазбаларынан қателер байқағандарын айтып, оның тіл білу деңгейіне күмән келтірді.
Айханым Оқасова әлеуметтік желідегі сынға жауап беріп, Гарвард университетінің Harvard College емес, Harvard Extension School бөлімшесіне құжат тапсырғанын түсіндірді.
Оның айтуынша, екі бөлімшенің қабылдау тәртібі мен талаптары әртүрлі. Ол құжаттарын 2025 жылы жіберіп, жауабын 2026 жылдың қазанында алғанын мәлімдеді.
Сондай-ақ оқушы Ailingo білім беру платформасының Гарвард өкілдерімен байланысы бар екенін және университет профессорының қатысуымен ғылыми зерттеу жүргізіп жатқанын айтты.
Айханым қабылдау хатындағы қолтаңбаға қатысты туындаған сұрақтарды анықтау үшін университетке өзі де жүгінгенін жеткізді.
Даудың ушығуына байланысты Айханымның анасы Асия Оқасова да мәлімдеме жасады.
Ол қызының тіл меңгергенін, аудармашылықпен және сабақ берумен айналысатынын растады. Анасының сөзінше, Айханым бірнеше жылдан бері еңбек етіп, тапқан ақшасын жинап келеді.
Ал шетелдік университеттерден келген хаттарға қатысты әйел қызының электрондық поштасына бөтен адамдар кіріп, жалған шақыртулар жіберуі мүмкін екенін жоққа шығармады.
Асия Оқасова жағдайдың анық-қанығын білу үшін құқық қорғау органдарына жүгінетінін айтып, көпшіліктен кәмелетке толмаған қызын әлеуметтік желіде қудаламауды сұрады.
Желі қолданушыларының назарын аударған тағы бір мәселе — Айханымның Ailingo білім беру платформасы арқылы тіл үйретуі.
Даниял Сүлейменнің пікірінше, егер оқушының шетелдік университеттерге түскені немесе халықаралық сертификаттары туралы мәліметтер оқушыларды тарту үшін пайдаланылса, олардың шынайылығы ерекше маңызды.
Өйткені ата-аналар балаларының білімі үшін ақша төлегенде, сабақ беретін адамның біліктілігі туралы дұрыс ақпарат алуға құқылы.
Алайда әзірге онлайн мектептің тұтынушыларды алдағанын немесе заң бұзғанын растайтын деректер жарияланған жоқ.
Қазіргі уақытта Айханым Оқасованың шетелдік университеттерге қабылданғаны туралы құжаттарына қатысты түпкілікті қорытынды жасалған жоқ. SHYNDYK.KZ редакциясы оқушы мен оның отбасына жағдайға қатысты қосымша түсініктеме беруге мүмкіндік беруге дайын.
