Ресурстық базаны дамыту, ішкі нарықты қамтамасыз ету, өңірлерді газдандыру және инфрақұрылымның жай-күйін қамтыған мемлекеттік аудиттің қорытындысы Әлихан Смайыловтың төрағалығымен өткен ЖАП отырысында қаралды.
Тексеріс көрсеткендей, елдегі жалпы газ қоры 3,8 трлн текше метр болғанымен, тауарлық шикізат өндірісі халық пен экономиканың өсіп келе жатқан қажеттіліктерінен қалып келеді. Бұл ретте жеткізілетін ресурстың сапасына қатысты да сұрақтар бар: стандартқа сай емес тауарлық газ жабдықтың тозуын тездетіп, ұлттық операторды экспорт кезінде жеңілдіктер жасауға мәжбүрлейді.
Инфрақұрылымның қатты тозуы да күрделі мәселе күйінде қалып отыр. 20 мың шақырым магистральдық газ құбыры мен 77 мың шақырым тарату желілерінің едәуір бөлігі нормативтік мерзімнен асып пайдаланылуда, ал жаңғырту қарқыны жеткіліксіз деп танылды. Сонымен қатар, аудиторлар стратегиялық жоспарлаудағы кемшіліктерді және геологиялық барлау мен жерасты қоймаларын дамыту бойынша тиісті шаралардың жоқтығын атап өтті.
Дегенмен, 2025 жылдың қорытындысы бойынша елді газдандыру деңгейі 64,2%-ға жетіп, 13,1 млн қазақстандық табиғи газға қол жеткізген. Алайда ЖАП өңірлік теңсіздіктер мен жаңа нысандарды пайдаланушы ұйымдарға уақытылы берудегі бақылаудың әлсіздігіне назар аударды.
Аудит қорытындысы бойынша бюджетке 59,4 млн теңге өндіріліп, 20,2 млрд теңге есепке алу және жұмыстарды орындау арқылы қалпына келтірілді. Жоғары аудиторлық палата құзырлы мекемелерге заңбұзушылықтарды жою бойынша тапсырмалар беріп, олардың орындалуын қатаң бақылауға алды.
