Оқиға тікелей концерт кезінде болған. Көрермендер арасында дау туындап, қауіпсіздік қызметінің қызметкерлері бұзақыларды концерт алаңынан шығаруға мәжбүр болған. Қалалық Полиция департаменті бұл ретте концерттің үзілмей, қалыпты режимде жалғасқанын қадап айтты.
Тексеру қорытындысы бойынша жанжал шығарған үш әйел анықталды. Олардың екеуі Алматы облысының тұрғындары болып шықты: біреуін сот 5 тәулікке әкімшілік қамауға алса, екіншісіне қоғамдық орында мас күйде жүргені үшін айыппұл салынды. Тараздан келген үшінші тәртіп бұзушыға қатысты ұсақ бұзақылық фактісі бойынша әкімшілік іс қозғалып, материалдар сотқа жолданды.
Бұдан бөлек, тәртіп сақшылары мониторинг барысында Instagram желісінде концерттің үзілгені туралы жалған ақпарат жарияланғанын анықтады. Аккаунт иесі жедел түрде анықталып, фейк таратқаны үшін әкімшілік жауапкершілікке тартылып, айыппұл төледі. Полиция қазақстандықтарға қоғамдық тәртіпті бұзғаны және көрінеу жалған ақпарат таратқаны үшін қатаң жаза қарастырылғанын тағы да еске салады.
