9 қараша күні таңғы сағат 6:30-дан 9:30-ға дейін Алматы метросының барлық бекетінде ONAY жүйесінің QR-коды арқылы жолақы төлеу мүмкін болмады.
Ақау тұрғындар жұмыс пен оқуға асығатын қарбалас уақытта болды. Соның салдарынан метро бекеттерінде жолаушылар көбейіп, ұзын-сонар кезек пайда болды.
Әлеуметтік желіде тараған кадрлардан бекеттерде адам қарасы қалыңдап, жолаушылардың өтуі қиындағанын көруге болады.
QR-код арқылы төлем жасай алмаған тұрғындар жолақыны басқа тәсілмен төлеуге мәжбүр болды.
Ал ONAY көлік карталары, банк карталары, Apple Pay, Samsung Pay және қағаз QR-билеттер арқылы төлем қабылдау қалыпты жұмыс істеген.
Алматы метрополитенінің баспасөз қызметі техникалық ақау сағат 9:30-да толық жойылғанын мәлімдеді. Қазір ONAY жүйесінің QR-коды арқылы жолақы төлеу қайта іске қосылды.
Метрополитен әкімшілігі жолаушылардан келтірілген қолайсыздықтар үшін кешірім сұрады.
