Тиісті өзгерістер Үкіметтің 2026 жылғы 4 қарашадағы №981 қаулысымен бекітілді.
Жаңа ережеге сәйкес, Ұлттық пантеонға жерленуге құқығы бар лауазымды тұлғалардың тізіміне мына қызмет иелері қосылды:
- Қазақстан Республикасының вице-президенттері;
- Құрылтай төрағалары мен олардың орынбасарлары;
- Қазақстан Халық Кеңесінің төрағалары мен олардың орынбасарлары;
- Қазақстан Республикасы Қауіпсіздік Кеңесі төрағасының орынбасарлары.
Бұған дейін бекітілген тізімде Қазақстан президенттері, премьер-министрлер мен олардың орынбасарлары, Парламент палаталарының төрағалары мен орынбасарлары, мемлекеттік хатшылар мен мемлекеттік кеңесшілер болған.
Сондай-ақ Ұлттық пантеонға Президент Әкімшілігінің басшылары, Конституциялық Кеңес, Конституциялық Сот, Жоғарғы Сот және Ұлттық банк төрағалары жерлене алады.
Бұл құқық министрлерге, президентке тікелей бағынатын және есеп беретін мемлекеттік органдардың басшыларына, облыстар мен Астана, Алматы және Шымкент қалаларының әкімдеріне де берілген.
Бұдан бөлек, Ұлттық пантеонға «Халық қаһарманы», «Қазақстанның Еңбек Ері» атақтарының иегерлері, «Алтын Қыран», «Отан», үш дәрежелі «Еңбек Даңқы» ордендерімен марапатталған азаматтар жерлене алады.
Тізімге Кеңес Одағының Батырлары, Социалистік Еңбек Ерлері және «Қазақстанның ғарышкер-ұшқышы» атағын алған азаматтар да кіреді.
Ерекше жағдайларда президенттің жеке шешімімен тізімде көрсетілмеген басқа да азаматтарды Ұлттық пантеонға жерлеуге рұқсат беріледі. Сондай-ақ пантеонға жерленуге құқығы бар адамдардың жұбайларын жерлеу мүмкіндігі қарастырылған.
Жаңа қаулыда жерлеу рәсімін ұйымдастыру тәртібі де нақтыланды. Енді бұл жұмысқа Астана қаласының, облыстар мен республикалық маңызы бар қалалардың жергілікті атқарушы органдары жауап береді.
Жерлеу рәсімі марқұмның жұбайының, жақын туыстарының немесе заңды өкілінің бастамасымен ұйымдастырылады.
Жергілікті билік қажетті құжаттарды рәсімдеуге, жерлеуге арналған заттарды қамтамасыз етуге, мәйітті Ұлттық пантеонға жеткізуге және жерлеу рәсімін өткізуге міндетті.
Сонымен қатар Ұлттық пантеонда жерленген азаматтарды тіркейтін арнайы кітап жүргізіледі. Онда марқұмның жеке деректері, өмірбаяны, Қазақстан алдындағы еңбегі, қайтыс болған және жерленген күндері көрсетіледі.
Ұлттық пантеон Астанада орналасқан. Ол мемлекет және қоғам қайраткерлерін, сондай-ақ ел алдында ерекше еңбегі бар азаматтарды жерлеуге арналған.
Қаулы 2026 жылғы 17 қарашадан бастап күшіне енеді.
